Deskrizzjoni

Is-sit web Moniteur belge huwa l-portal tal-aċċess pubbliku għal-leġiżlazzjoni Belġjana online. Hu jagħti aċċess dirett għall-Moniteur belge (il-Ġurnal Uffiċjali tal-Belġju) stess u għal ġabra ta' leġiżlazzjoni konsolidata u għal indiċi. Il-leġiżlazzjoni federali, u dik tal-komunitajiet (Fjamminga, Franċiża u dik li titkellem bil-Ġermaniż) u tar-Reġjuni (tal-Wallonja, Fjammingi u ta’ Brussell Kapitali) li jiffurmaw il-federazzjoni, hija aċċessibbli permezz ta' dan is-sit web. Is-sit hu mmaniġġjat mill-Ministeru Federali tal-Ġustizzja [Service public fédéral de la justice – SPF Justice].

Tista’ tikkonsulta l-leġiżlazzjoni Belġjana fil-verżjoni oriġinali ppubblikata fil-Moniteur belge (Ġurnal Uffiċjali) jew fil-verżjoni kkonsolidata (Leġiżlazzjoni konsolidata) minn Justel, servizz ta’ informazzjoni legali integrat fil-Moniteur belge. Mill-2003 l-leġiżlazzjoni ppubblikata fil-Moniteur belge ġiet ippromulgata kuljum fil-format elettroniku biss, u l-PDF tat-testi ppubblikati fil-Ġurnal minn dakinhar jitqiesu bħala l-unika verżjoni uffiċjali.

• Il-Moniteur belge

Is-sit web tal-Moniteur belge jagħti aċċess għall-verżjoni elettronika tal-Moniteur belge għall-jum inkwistjoni (taqsiriet u testi sħaħ) u l-edizzjonijiet preċedenti li jmorru lura għal Ġunju 1997. Il-Moniteur huwa ppubblikat bit-tliet lingwi uffiċjali tal-Belġju: il-Franċiż u l-Olandiż (test sħiħ) u l-Ġermaniż (parti minnu).

Il-Moniteur belge hu pubblikazzjoni elettronika ta’ kuljum li fiha kontenut prinċipali, li hu ppaġinat skont is-sena, u annessi li fihom atti li jirrigwardaw persuni legali (negozji u assoċjazzjonijiet) (ippubblikati kuljum) u l-kontijiet annwali tan-negozji (ippubblikati biss kull nhar ta’ Tnejn).

• Il-Ġabra ta’ leġiżlazzjoni konsolidata

Din il-bażi tad-data tagħtik l-aċċess għall-verżjonijiet ikkonsolidati aġġornati tal-leġiżlazzjoni ppubblikata fil-Moniteur belge. Xi testi li ġew ippubblikati qabel l-1995 u għadhom fis-seħħ jistgħu, madankollu, ma jkunux riprodotti fit-totalità tagħhom.

Din il-ġabra hi magħmula minn żewġ bażijiet tad-data (indiċi leġiżlattiv u bażi tad-data tat-testi sħaħ) li jiġu kkonsultati permezz ta’ interface uniku li jippermetti li l-informazzjoni miż-żewġ bażijiet tad-data jiġu ppreżentati b'mod integrat. L-emendi magħmula bħala referenzi fil-bażi tad-data indiċi-leġiżlattiva għalhekk jistgħu jiġu kkonsultati fil-verżjoni sħiħa ta’ test f’tabella li hi aġġornata kuljum (D+1). Għalhekk, l-utenti jistgħu jikklikkjaw il-hyperlinks għall-Moniteur belge biex isiru jafu dwar l-emendi l-aktar reċenti ppubblikati fil-Ġurnal il-jum ta’ qabel.

L-atti legali

Il-Kostituzzjoni hija l-ogħla punt ta' referenza għal-leġiżlazzjoni domestika Belġjana. Din tirregola s-separazzjoni tas-setgħat u l-mod kif jiġu eżerċitati s-setgħat. Din tistabbilixxi wkoll il-valuri fundamentali tas-soċjetà u d-drittijiet fundamentali taċ-ċittadini.

F’sentenza mogħtija fis-27 ta’ Mejju 1971, il-Qorti tal-Kassazzjoni ddeċidiet li l-istrumenti internazzjonali u supranazzjonali jieħdu preċedenza fuq strumenti nazzjonali, inkluża l-Kostituzzjoni. Jekk Regolament tal-UE jkun f’kunflitt mal-Kostituzzjoni, ir-Regolament jieħu preċedenza.

Skont il-Kostituzzjoni, f’ordni dixxendenti, hemm:

• atti speċjali (lois spéciales) – atti li jgħaddu b'maġġoranza speċjali li jiddeterminaw id-diviżjoni tas-setgħat u r-regoli operattivi ewlenin tal-istituzzjonijiet pubbliċi;
• atti (lois), digrieti (décrets) u ordinanzi (ordonnances);
• ordnijiet irjali (arrêtés royaux) u ordnijiet tal-gvern (arrêtés de gouvernement) li jimplimentaw atti jew digrieti; kif ukoll;
• ordnijiet ministerjali (arrêtés ministériels).